Skip to main content

TRANSPARENCIA
E PREGUNTAS FRECUENTES

TRANSPARENCIA

Implicadas no desenvolvemento é unha asociación sen ánimo de lucro que ten como principal obxectivo contruibuír á mellora das condicións de vida das comunidades máis empobrecidas do mundo. Isto lévase a cabo a través dun concepto de desenvolvemento baseado na superación da discriminación de xénero e da concienciación, da comunidade galega en particular e do primeiro mundo en xeral, sobre as estruturas de poder que se establecen entre o Sur e o Norte e que perpetúan as inxustizas e desigualdades.

Actualmente, a xunta directiva está integrada por unha presidenta, vicepresidenta, tesoureira e secretaria, elixida en asemblea xeral ordinaria, aberta a todas as persoas asociadas.

Ademais, contamos cun grupo de apoio formado por tres persoas con amplo percorrido dentro da asociación e no activismo. Todo o equipo colabora de xeito totalmente altruísta.


DESCARGA A DOCUMENTACIÓN

MEMORIA 2023
PLANIFICACIÓN 2024
ESTATUTOS

PREGUNTAS FRECUENTES

Como nos financiamos?
A nosa principal fonte de financiamento son as cotas das socias. Ademais, organizamos diferentes actividades de recadación de cartos no territorio galego.

Non dependemos de institucións ou empresas. Hai tempo que decidimos non optar a axudas públicas para apoiar as compañeiras do Sur porque adoitaban supor relacións de supervisión non acordes coa nosa filosofía.

Minimizamos os gastos de estrutura (destinados exclusivamente ao aluguer dun trasteiro, gastos de xestoría ou comisións bancarias) para optimizar a maior parte do recadado e investilo nos programas de cooperación ao desenvolvemento nos que colaboramos.

Podes consultar a relación completa de ingresos e gastos na memoria anual.
Que acontece coa miña contribución?

Os cartos que se recollen mediante doazóns e as contribucións da base asociativa permítenos financiar, do xeito máis independente posible, os procesos das compañeiras do Sur e as actividades de formación, sensibilización e acción crítica en Galicia.

As nosas contas son públicas, pódelas consultar na memoria anual.

Como podo solicitar o meu certificado de doazóns?
Se es socia de Implicadas ou realizaches algunha doazón no último ano podes beneficiarte de deducións no IRPF e no Imposto de Sociedades.

O certificado de doazóns é un documento que deberás presentar na Declaración da Renda e que dá dereito a desgravar ata un 80% (un 35% no caso das empresas) dos donativos e/ou aportacións periódicas.

Solicita o teu certificado de doazóns de Implicadas, escribíndonos un correo electrónico a: secretaria@implicadas.com